«Ата Журт» партиясынын лидери Камчыбек Ташиев Садыр Жапаровду түрмөдөн бошотуу маселеси боюнча президент Сооронбай Жээнбековго кайрылды. «Азаттыктын» «Эки бир» көрсөтүүсүндө журналисттердин суроолоруна жооп берип жатып айтты.
— Садыр Жапаров түрмөдө акыйкатсыз отурганын белгилейм. Аны чыгарууну президенттен суранам. Аны «бул киши чыгарбай жатат» деп анык айта албайм, себеби аны билбейм. Бирок Садырдын камакта кармалышын таш боордук деп эсептейм,- дейт Ташиев.
Эске сала кетсек, камакта жаткан Жогорку Кеңештин экс-депутаты Садыр Жапаров президенттен ырайым сурап кайрылгандыгы жакынкы күндөрү маалым болгон.
Кайрылууда Садыр Жапаров өзү айыпталган иште күнөөсү жок экенин белгилеген. Абакта олтурган кезинде ата-энесинен, андан соң уулунан ажыраганын, жакындары оор абалда экенин айткан. Аларга учурда өзүнүн колдоосу керектигин айтып президенттен ырайым кылып эркиндикке чыгарууну өтүнгөн.
Садыр Жапаров 2017-жылдын март айынан бери Чүйдүн Аламүдүн районундагы Молдовановка айылындагы №1 түзөтүү жайында жазасын өтөп жатат.
Ал Кылмыш-Жаза Кодексинин 227-беренесинин 2-бөлүгү (барымтага алуу) боюнча Бишкектин Биринчи май райондук соту тарабынан 2017-жылдын 2-августунда соттолуп, 11 жыл 6 айга эркиндигинен ажыратылган.