Экономикалык кылмыштарга каршы күрөшүү мамлекеттик кызматы (ЭКККМК) түштүк бажысынын экс-башчысы Райымбек Матраимовдун мүлкүн текшере баштады. Бул тууралуу президенттик аппараттан кабарлашты. Декабрда президент Сооронбай Жээнбеков өзүнүн басма сөз жыйынында Матраимовдун мүлкүн укук коргоо органдары текшерет деп убада кылган.
Президенттин басма сөз катчысы Толгонай Стамалиева «24.kg» маалымат агенттигине кабарлагандай, финпол Матраимовдун мүлкүн 31-январда текшере баштаган.
Айрым маалымат булактары билдиргендей, финполицияда Райымбек Матраимовдун тууганы Исламбек Матраимов иштейт. Ал мекеменин ички иликтөө жана коопсуздук башкармалыгын жетектейт.
Белгилей кетсек, 2018-жылы 19-декабрда президент Сооронбай Жээнбеков басма сөз жыйынында укук коргоо органдары Райымбек Матраимовдун мүлкүн текшеришет деп убада кылган. 2017-жылы февралда «Азаттыктын» журналисттери аткаминердин наамындагы хан сарайларды, супермаркеттерди жана спорт ордолорун табышкан.
Экс-президент Алмазбек Атамбаев Матраимовду бажы тармагындагы коррупциялык схемалардын «көмүскө кардиналы» деп атаган. Ошол кезде премьер-министр болуп турган анын жакың үзөңгүлөшү Сапар Исаков Матраимовду Жээнбеков президенттик кызматка келгенге чейин бир күн мурда бажы кызматынын жетекчи орун басарлык кызматынан алган. Бирок 2018-жылдын ортосунда сот Матраимовду кызматка кайтарууну токтом кылган, анткени ал «саясий мүнөздөр менен бошотулган».