Бириккен Араб Эмираттары алгачкы жолу «Аль-Амаль» («Үмүт») аттуу космикалык зондун Марска учурду. Анын жардамы менен өлкө жыл бою кызыл планетанын аба-ырайынын калыптанышын изилдөөнү көздөөдө.
Бул миссиянын баасы 200 миллион долларды түзгөндүгү айтылат.
Космостук аппарат Танэгасима аралындагы япониялык космодромдо 20-июлда жергиликтүү убакыт менен саат 01:58 учурулду. Ал Марска жети айдын ичинде жетет деп күтүлүүдө.
Расмий маалыматтар боюнча, зонд 430 чакырым бийиктикте ракета-алып жүрүүчүдөн ийгиликтүү ажырады.
Алгач ракетаны учуруу 14-июлга белгиленген, бирок аба ырайына байланыштуу эки жолу кийинкиге жылдырууга туура келген.