Коомдук ишмер Ассол Молдокматова Россиянын президенти Владимир Путинге коронавирус менен күрөшүүдө кыргыз элине жардам берүүсүн суранып кайрылды. Ал өзүнүн видео билдирүүсүн Инстаграмдагы баракчасына жарыялады.
«Урматтуу Россия Федерациясынын президенти! Урматтуу Владимир Владимирович!
Мен Кыргызстандагы коомдук ишмер Ассоль Молдокматовамын. Сизден Кыргызстан элине жардам берүүңүздү суранам. Өлкөдө гуманитардык катастрофа болууда: медициналык жабдуулар, ИВЛ аппараттары, кычкылтек концентраторлору, дары-дармектер жана кесипкөй кадрлар жетишсиз. Россия айыгышкан душман — коронавируска каршы «Авифавир» дарысын иштеп чыгып, жеке коргонуу каражаттарынын өндүрүшүн уюштуруп, ооруканаларды куруп, чечкиндүү бөгөт койгонун билебиз.
Сизден Кыргызстандын элине жардам берүүңүздү өтүнөм. Өлкөдө каза болгондордун саны көп болууда. Кыйынчылыктарга туруштук бере албайбыз. Мен Сизден жардам сурайм», — дейт Молдокматова.