Бишкек шаарынын Биринчи май райондук сотунда былтыр 7-8-август күнү Кой-Ташта болгон окуялар боюнча кылмыш иши боюнча отурум өтүүдө.
Сотто Марат Сыдыков төрагалык кылууда.
Мамлекеттик айыптоочу Эрнест Асакеев кабарлагандай, кайрадан отурумга айыпталуучулардын жактоочулары келбегендиктен жыйын 10-июлга саат 10:00 жылдырылган. «Андан тышкары, айыпталуучулар убактылуу кармоочу жайдан алып келинген эмес», — дейт прокурор.
Эскерте кетсек, 7-август күнү мурдагы президент Алмазбек Атамбаевди тергөө органдарына күчтөп алып келүү учурунда күч түзүмдөрү менен мурдагы президенттин тарапташтары ортосунда кагылышуу болгон. Анын жыйынтыгында атайын даярдыктагы бөлүктүн кызматкери каза болуп, ондогон адам ар кандай жаракат алган.
8-август күнү кечинде Атамбаев кармалып, Биринчи май райондук соттун чечими менен ал УКМКнын тергөө абагына камакка алынган.