Пара менен кармалган судья кызматынан четтетилди

Окуялар тизмеги 17 Июн 2020 17:25
0 ой-пикир

Президент Сооронбай Жээнбеков кол койгон жарлыкка ылайык, Кыргыз Республикасынын Судьялар кеңешине караштуу Тартип комиссиясынын берген сунушунун негизинде Бишкек шаарынын Биринчи май райондук сотунун судьясы Орозбакова Максат Асанкуловна кызмат ордунан убактылуу четтетилди. Бул тууралуу президенттин аппаратынын маалыматтык саясат бөлүмү билдирди.

Мамлекет башчысына Кыргыз Республикасынын Судьялар кеңешине караштуу Тартип комиссиясынын жергиликтүү соттун судьясы Максат Орозбакованы кызмат ордунан убактылуу четтетүү жана жазык жоопкерчилигине тартууга макулдук берүү тууралуу сунуштамасы келип түшкөн.

Буга Кыргыз Республикасынын Башкы прокурору Өткүрбек Жамшитовдун Кылмыштардын жана жоруктардын бирдиктүү реестринде опузалап пара алуу фактысы катталганы тууралуу көрсөтүлгөн сунуштамасы негиз болгон.

Эскерте кетсек, Максат Орозбакованы быйыл 12-мартта Экономикалык кылмыштарга каршы күрөш боюнча мамлекеттик кызмат (Финансы полициясы) пара алууга шектүү катары кармаган. 

Финполдун маалыматына караганда, ал «2000 доллар пара алып жаткан жеринен» колго түшүрүлгөн. Натыйжада сотко чейинки өндүрүш башталган.

Ой-пикир калтыруу

Ваш e-mail не будет опубликован.

Конул бурунуз: Сиздин пикириниз сайттын администраторунун модерациясынан кийин жайгаштырылат.