Кыргызстанга Россиядан дагы 533 жаран кайтып келди. Бул тууралуу тышкы иштер министрлигинин басма сөз кызматынан билдиришти.
“Россиядан дагы 533 кыргызстандык кайтып келди. Ошентип, Оренбург облусунун Соль-Илецк шаарынан мекенине жалпы 1496 жаран, КР өкмөтү бөлүп берген 32 автобус менен кайтып келишти”, — деп айтылат маалыматта.
Буга чейин Соль-Илецк шаарынан кыргызстандык жүргүнчүлөрү менен 20 автобус 6-июлда Бишкекке келген. Бул автобустар менен 963 кыргызстандык жаран мекенине кайтып келди.
Министрликтен кошумчалашкандай, Соль-Илецк шаарында туруп калган кыргызстандык жарандарды мекенине алып кетүү үчүн Казакстан менен транспорттук коридор түзүп берүү маселеси макулдашылган.