Алтынбек Сулаймановдун ачуу чындыгы…

Окуялар тизмеги 27 Дек 2019 14:17
0 ой-пикир

Жогорку Кеңештин депутаты Алтынбек Сулайманов Фейсбуктагы баракчасына “Өмүрбек Чиркешовичтин комментарийине комментарий” деген темада пост жарыялады.

«Бир Бол» фракциясынын лидери Кыргызстанда парламенттик башкаруунун ишке ашпай калганына, супер президенттик башкаруу жаралышына Өмүрбек Текебаевди айыптады.

“Өмүрбек Чиркешовичтин кечээги айтып чыкканын окуп алып, мындан 8 жыл мурунку окуялар эсиме түштү.
2010-жылы күзүндө жаңы парламент келип, өзүнө төрага шайлоодо накта демократияны, парламенттик башкарууну, жаңы Конституцияны иштетүүдө өзүнүн биринчи кадамын таштады. Ал кезде бийлик убактылуу өкмөттүн колунда болчу. Бийликтен эл корккон жок, убактылуу өкмөт ойдогудай добуш ала албады, шайланып келген депутаттар да бийликтен корккон жок. Өмүрбек Текебаевди төрагалыкка шайлабай койдук, бул күнү Текебаев утулган жок, демократия утту десек болот. Ошол күнү демократия орноп, парламент бийликке тишин көрсөтүп, өз алдынча башкаруу системасын түзө алды. Бирок ал жакшы көрүнүш көпкө узабады.

2011-жылы Алмазбек Атамбаев президент болуп келген күнү биринчи ишин парламентти чөгөлөткөндөн баштады. Ахматбек Келдибековду төрагалыктан алып түштү. Ушул жерде Өмүрбек Текебаевсиз бул план ишке ашмак эмес. Өмүрбек Чиркешович мага таарынбаса керек, бул тарых – өзү жазган Конституцияны өзү талкалай баштады.

Жаңы өкмөт башчысы Текебаевге да, Атамбаевге да жакпады, жаштар күчтөнүп кете электе буларды жайлабасак болбойт деген бүтүмгө келип, Өмүрбек Бабановду да өкмөт башчылыгынан айдашты.

Ошол күндөн баштап мамлекетте супер президенттик башкаруу пайда болду. Бул тарых, буга Өмүрбек Чиркешовичтин салымы чоң. Ошентип, Текебаев Атамбаевге бүт бийликти колуна карматты, ошол кетирген катасынын азабын бүгүн көрүп жатканын өзү да билсе керек…

Биз баарыбыз уралап айтканыбыз башка, жасаганыбыз башка. Бул биздин чоң көйгөйүбүз. Ошондуктан башкаруу системасы да өзүбүзгө жараша болуп жатат. Бизде парламенттик башкаруу деп айтканыбыз менен, жашообузда башкача, парламенттин орду жок! Бул ачуу чындык!”

Эске сала кетсек, 26-декабрда «Ата-Мекен» партиясынын лидери Өмүрбек Текебаев «Азаттыкка» берген маегинде президентти Баш мыйзамды бузбоого чакырды. Ал Сооронбай Жээнбековду өкмөт башчынын ыйгарым укутарын алып алды деп сындаган.

Ой-пикир калтыруу

Ваш e-mail не будет опубликован.

Конул бурунуз: Сиздин пикириниз сайттын администраторунун модерациясынан кийин жайгаштырылат.