Алмаз Баратов — атайын Elgezit.kg үчүн.
Кыргыз төңкөрүштөрүнүн “бульдозери” Азимбек Бекназаров Малайзияга элчи болууга талапкер болууда. Бул тууралуу жазбаган социалдык медиа жана ММК жок калды окшойт. Чындыгында, Бекназаров өзгөчө талапкер болду десем жаңылышпайм. “МГИМОну” бүткөн эмес, дипломаттык сапаттарга ээ эмес, чет тилдерин билбейт. Бул кадам бийлик кадр тандоодо дагы жаңылышканынан кабар берет.
Россиянын Тышкы иштер министри Сергей Лавров элчи кызматына дипломаттар эмес, саясатчылар дайындалып жатканы тууралуу суроого жооп берип жатып айткандай, бул абалга “философиялык” жактан карасак да болот. Мындай практика баардык өлкөлөрдө бар. Мындай саясий ишмерлердин айрымдары чет өлкөгө ыраазычылык катары же сүйлөшүүлөр аркылуу барышса, кээ бирлери ишке барган тараптын жетекчилиги менен көйгөйлөрдү чечүү үчүн дайындалышат. Өз убагында Виктор Черномырдин Украинадагы Россиянын элчиси болгондой.
Кыргызстанда мындай кадамдар баардык президенттердин убагында болгон. Кыргызстандын элчиси катары дайындалган саясатчылардын, коомдук ишмерлердин жада калса, айрым журналисттердин дипломатия тармагында эч кандай тажрыйбасы болгон эмес жана алар дайындалган өлкөнүн тили тургай, англис тилин дагы билишчү эмес. Көбү “сөздүк менен которо алам” дегендер болчу. Алардын арасында дипломаттык кызматын аткаруу учурунда каталар кеткенби, ызы-чуулар болгонбу бул башка кеп.
Дипломаттарды кой, өлкөнү жетектеген азыркы аткаминерлер сөздөрдөгү басымдарды туура эмес коюп, географиялык аталыштарды туура эмес айтышып уятка калып жатышпайбы.
Ал эми Малайзияга келе турган болсок, бул өлкөдөгү Кыргызстандын элчилигин дайыма эле дипломатиядан алыс кишилер башкарып келген. Ошол эле Турсунбай Бакир уулу, Кылыч Султанов жана Равшан Жээнбеков.
Булардын баары ошол учурдагы саясий кырдаалга жараша кызматка дайындалып калышпады беле.
Демек, Азимбек Бекназаровду элчи кылып жиберип жаткан Сооронбай Жээнбековдун кадамдары логикага ылайык эле десек болот.
Бекназаров өзүнүн элчилик кызматын соодалашып алган жана бул сыр деле эмес. Башка жагынан алсак, Азимбек Бекназаров коомчулукту курултайларга чакырып дүрбөтүп, бийликти коркутуп-үркүтүү менен алек болбой, алыс жактарга кетсе өлкө үчүн алда канча жакшы болору бышык.
Англис, малай тилин билбесе, дипломатиялык тартиптен кабары жок болсо койсун, андан көрө Куала-Лумпурда отурганы жакшы эмеспи.
“Бульдозердик” кадамдары менен коомчулукту дүрбөтүп чуу чыгарып, андан соң башаламандык болуп, мародерчулукка чейин жеткен абалдан өлкөнү чыгарууга кеткен каражаттан көрө, Азимбек Бекназаровго элчи кызматы үчүн маяна төлөгөнү өлкө үчүн арзан түшөт эмеспи. Демек, ушул эки себепти карап тандоо жасай турган болсок, анда Азимбек Бекназаровду Куала-Лумпурга кетирүү абдан эле пайдалуу десек болот.
Редакция макала үчүн жоопкерчилик албайт, автордун пикири редакциянын көз карашын билдирбейт.