Чүйдүн Молдовановка айылындагы №1 түрмөдө жаза мөөнөтүн өтөп жаткан 23 жаштагы адам өзүнө кол салды. Бул маалыматты Жаза аткаруу мамлекеттик кызматынын (ЖАМК) басма сөз кызматынын өкүлү Самат Калыков ырастады. Анын маалыматына караганда, окуя 1-декабрда болгон.
Айрым жалпыга маалымдоо каражаттары каза болгон адамдын туугандары өлгөн киши суицидге барбаганын, анын денеси күйгөнүн байкаганын билдиришкенин жазып чыгышты. Калыков бул боюнча да комментарий берди.
— Тергөөчү менен эксперт анын денесин текшерген. Алдын ала маалымат боюнча суицид болгон. Азыр тиешелүү документтер топтолуп, иликтөө иштери жүрүп жатат. Окуя Кылмыштардын жана жоруктардын бирдиктүү реестрине катталган, — деди Калыков.
Ошондой эле документтер соттук-медициналык экспертизага жиберилген. Жыйынтыгы чыга элек.