Тарых илимдеринин доктору, профессор Зайнидин Курманов — атайын Elgezit.kg үчүн.
Рональд Рейган америкалык коомчулуктун жашоосун жакшыртып, экономикага жаңы жашоо берген ийгиликтүү президенттердин бири болгон. Анын шайлоо алдындагы лозунгу жөнөкөй жана америкалыктарга түшүнүктүү болгон – консервативдик баалуулуктарды кайтаруу менен Американы кайрадан ийгиликтүү кылуу. Себеби 60-жылдары Америка жана бүтүндөй батыш дүйнөсү массалык түрдө жаңы маданиятка өтүп, башаламандык башталган, көчөдө хиппи, япии ж.б. кыймылдар пайда болгон. Дин, үй-бүлөлүк мамилелер, жан дүйнө, мораль, адеп-ахлак сыяктуу салттуу баалуулуктар жок болгон. Ошондуктан Рейгандын бийликке келүүсү менен Батыш Европада Маргарет Тэтчер, Гельмута Коля ж.б. сыяктуу консерваторлор бийликке келишкен.
Бул Батыш дүйнөсүнүн өнүгүшүндө бир топ узак мезгил болгон, ал шайлоо жана саясий кризиске, саясий системалардын туруксуздугуна чекит койгон, себеби мурда башкаруучулар 1-2 жыл иштеп, парламенттер көп учурда таркатылып же өзүн-өзү таркатып, жалпы коомдун кызыкчылыгында биргелешип башкаруу жүргүзө алышкан эмес. Америкалыктар Рейганды шылдыңдашып, элге таанылбаган актер максатын ишке ашыра албайт деп санашкан. Ал качандыр бир убакта эң бай болгон Калифорния штатында эки жолу губернатор болгонуна көңүл бурушкан эмес.
Туруктуу электорат калыптанган жерде шайлоочулар белгисиздерге көп добуш беришпейт эмеспи. Демек, добушка жетүү үчүн аракет кылуу керек! Ошол маалда Батыш биргелешип капиталисттик системаны каптаган руханий кризистен чыгып, мурункусуна караганда саясий, экономикалык жана аскердик жактан алда канча күчтүү болду. Дал ошол маалда социалисттик система жана СССР кулады. Жада калса Рейганга кол салуу болуп, ал жарадар болгон. Ал америкалыктардын эсинде карапайым америкалыктардын жашоо деңгээлин көтөрө алган эң жөнөкөй, сүйүктүү президент катары калды.
Азыр Кыргызстан адеп-ахлактык кризисти башынан кечирүүдө, ал өлкөнү төмөн тартканы тарткан. Руханий жана үй-бүлөлүк баалуулуктар да ыдырап, коррупция, бандитчилик, сойкулук, таш боордук, зомбулук, көрө албастык күч алды. Элибизди, мамлекетибизди жана анын келечегин жоготуп албаш үчүн эмне кылуу керектигин азыртадан ойлонушубуз керек.