Улуттук коопсуздук боюнча мамлекеттик комитеттин президенттик шайлоого катышуу үчүн арыз берген мурдагы төрагасы Абдил Сегизбаев премьер-министрлик кызматты убактылуу тапшырган Садыр Жапаровду ачык дебатка чакырды.
Мындай чакыруусун Абдил Сегизбаев 7-декабрда «Азаттыктагы» маегинде билдирди. Ал акыркы он күндө бир адам ар кыл күчтөр ортомчуларды салып, ар кандай кызматтарды сунуш кылып жатканын кошумчалады:
«Мен эң күчтүү талапкер деген адамды дебатка чакырам. Мага ортомчуларды салып жатыптыр. Бетме-бет сүйлөшөлү. Артыбыздан сөз кылбайлы. Эгер эркек болсо, түзмө-түз мага чыксын, дебаттан ар бирибиз өз чындыгыбызды айталы. Кимдин-ким экенин, кандай максат көздөп жатканын ачык сүйлөшөлү».
«Күчтүү деген талапкер ким? Садыр Жапаровбу?» деген суроого Абдил Сегизбаев «ошол кишини айтып жатам» деп жооп кайтарды. 15-декабрда, шайлоо өнөктүгү учурунда бир катар маалыматтарды ачыкка чыгара турганын айтты.