Бүгүн, 1-июлда Ош облусунун Кара-Суу районундагы Кара-Суу шаарынын мэрин шайлоо ѳтүүдө. Бул тууралуу Борбордук шайлоо комиссиясынын (БШК) басма сөз кызматы билдирет.
Маалыматка ылайык, Кара-Суу шаарынын мэринин кызмат ордуна 1 талапкер – Кара-Суу райондук кеңешиндеги КСДП фракциясынын ѳкүлү Лолобаев Адыл Манасович катталган.
Маалымат иретинде: Кара-Суу шаарынын мэри берген арызынын негизинде 2020-жылдын 4-мартында ээлеген кызматынан бошотулган.
БШКнын 2020-жылдын 6-мартындагы токтомуна ылайык шаардын жаңы мэрин шайлоо 2020-жылдын 25-мартына дайындалган.
Коронавируз пандемиясынан (COVID-19) улам ѳзгѳчѳ кырдаал режими киргизилгендигине байланыштуу шайлоолор 23-мартта токтотула турган.
Өзгөчө абал алынгандан кийин 29-июндан тарта жандандырылган, ал эми добуш берүү күнү 1-июль аныкталган
«Жергиликтүү ѳз алдынча башкаруу жѳнүндѳ» КР Мыйзамына ылайык шаардын мэрин шайлоо жашыруун добуш берүү аркылуу жергиликтүү кеңештин депутаттары тарабынан жүргүзүлѳт.
Кара-Суу шаардык кеңешинде 31 депутат бар. Шаардык кеңештин депутаттарынын жалпы санынын кѳпчүлүк добушун алган талапкер шайланды деп эсептелинет.
Шайлоо Кара-Суу аймактык шайлоо комиссиясы тарабынан ѳткѳрүлүүдө.
