Мурда алынган өткөрмө кагаздарынын мөөнөтү узартылды. Бул тууралуу Жалал-Абад жана Сузак районунун коменданты Жеңиш Жоробеков билдирди.
Жоробеков 15-апрелге чейин киргизилген өзгөчө абал тартибинин мөөнөтү 30-апрелге чейин узартылганын айтып, коменданттык сааттын убактысы өзгөртүлгөнүн – 21:00-06:00 сааттар арасы – билдирди.
Мындан улам ал мурда алынган уруксат өткөрмө кагаздары боюнча суроолор жаралып жатканын айтып, алардын мөөнөтү узартылганын белгиледи.
«Уруксат кагаздарынын мөөнөтү 30-апрелге чейин автоматтык түрдө узартылды», — деди комендант.
Белгилей кетсек, Кыргызстандын Бишкек, Ош, Жалал-Абад, Нарын шаары жана Ноокат, Кара-Суу, Сузак райондорунда коронавируска байланыштуу киргизилген өзгөчө абал режими 30-апрелге чейин узартылды. Ошондой эле өзгөчө абал режими 30-апрелге чейин Нарын шаары жана Ат-Башы районунда киргизилди.