Кыргызстандык беш спортчу Токиодогу 2020-жылы өтө турган Олимпиада оюндарына жолдомо утуп алган. Биздин спортчулар сууда сүзүү, жеңил атлетика, грек-рим күрөшү жана кыз-келиндер арасында күрөш боюнча мелдештерге катышышат.
Олимпиада оюндарынын салтанаттуу ачылыш аземи ушул жылдын 24-июлунда өтөт. Учурда Олимпиада оюндарынын расмий сайтында мелдештердин ырааттамасы жарыяланды.
Ага ылайык, суучул Денис Петрашов сууда сүзүүнүн эки түрү боюнча катышат.
- 25-июлда Бишкек убактысы боюнча саат 16:00дө сууда сүзүүнүн брасс түрү боюнча 100 метр аралыкка;
- 28-июлда Бишкек убактысы боюнча саат 07:30да сууда сүзүүнүн брасс түрү боюнча 200 метр аралыкка.
Жөө күлүк Дарья Маслова жана Юлия Андреева:
- 8-августта Бишкек убактысы боюнча саат 04:00дө – марафон.
Грек-рим күрөшү боюнча 87 кг салмакка чейинки балбан Атабек Азизбеков:
- 4-августта Бишкек убактысы боюнча саат 08:00дө мелдештин 1/8 финалынан баштап катышат.
Кыз-келиндер арасында күрөш боюнча дүйнө чемпиону Айсулуу Тыныбекова (62 кг чейинки салмак):
- 4-августта мелдештин 1/8 финалынан баштап катышат.