Матраимовдордун үй-бүлөсүнүн үч басылманын жана журналисттин үстүнөн жазган доо арызы бүгүн 19-декабрда саат 14:00дө Свердлов райондук сотунда каралат. Бул туурасында Бишкек шаардык сотунун басма сөз кызматынан билдиришти.
Отурумга Свердлов райондук сотунун судьясы Жылдыз Ибраимова төрагалык кылат.
Эскерте кетсек,Матраимовдордун үй-бүлөсү «Азаттык» радиосун, кабарчы Али Токтакуновду, Kloop.kg жана 24.kg сайттарын 9-декабрда сотко берип, жалпы өлчөмү 60 миллион сомдук доо койгон.
Аталган маалымат каражаттары «Матраимовдордун кадыр-баркына доо кетиргени» белгиленип, моралдык чыгым өндүрүү жөнүндө талап коюлган. Анын негизинде Бишкектин Свердлов райондук соту басылмалардын банк эсептерин камакка койгон. Кийинчерээк Матраимовдордун адвокатынын арызынын негизинде эсептер кайра камактан чыгарылган.
Cотко арыз төмөнкүлөрдүн атынан жазылган:
- Искендер Матраимов, Жогорку Кеңештин депутаты;
- Райымбек Матраимов, Мамлекеттик бажы кызматынын төрагасынын мурдагы орун басары;
- Минавар Жумаева, Искендер Матраимовдун аялы;
- Уулкан Тургунова, Райымбек Матраимовдун аялы;
- «Исмаил Матраимов атындагы фонд» коомдук кайрымдуулук фонду.
Доонун суммасы:
- «Азаттык Медиа» мекемесине – 22,5 миллион сом;
- Журналист Али Токтакуновго – 10 миллион сом;
- 24.kg маалымат агенттигине – 15 миллион сом;
- «Клооп Медиа» коомдук фондуна – 12,5 миллион сом
Соттун аныктамасында Матраимовдордун арызы эмнеге байланыштуу экени так көрсөтүлгөн эмес. Мурдараак Райымбек Матраимов журналисттер аткезчиликке байланыштуу чыгарган иликтөөлөргө байланыштуу сотко кайрыларын билдирген болчу.