Казакстанда 2-августта саламаттык сактоо министринин орун басары Олжас Абишев кармалды. Бул тууралуу Финансы министрлигине таянып жергиликтүү маалымат каражаттары жазышты.
«Финансы министрлигинин Каржылык мониторинг боюнча комитети бюджеттик каражатты уурдаган деген шек менен саламаттык сактоо министринин орун басары Олжас Абишевдин кармалганын ырастайт», — деп айтылат маалыматта.
37 жаштагы Абишев саламаттык сактоо министринин орун басарлыгына 2018-жылы дайындалган. Ал мекеменин маалымат коопсуздугу жана санариптештирүү тармагын тейлечү.
Буга чейин Коррупцияга каршы кызматтын башчысы жогорку даражалуу эки аткаминерге кылмыш иши козголгонун билдирген.