Борбордук шайлоо комиссиясы 4-октябрга белгиленген парламенттик шайлоону кийинкиге калтыруу маселесин кароодон баш тартты. Бул тууралуу БШКнын мүчөсү Атыр Абдрахматова билдирди.
Анын айтымында, бул сунуш 2020-жылдагы парламенттик шайлоону өткөрбөө жөнүндө эмес, кийинкиге калтыруу жөнүндө, анткени учурдагы эпидемиологиялык кырдаал аларды 4-октябрда өткөрүүгө жол бербейт.
«Партиялардын өз курултайларын жана үгүт иштерин кандайча өткөрөрү белгисиз. Чет өлкөдө, ошол эле аймактарда пандемия мезгилинде добуш берүүнү кантип уюштурабыз туңгуюк», — дейт Атыр Абдрахматова.
Анын пикиринде, шайлоого күрөөгө коюлган каражаттарды коронавирус жана пневмония менен күрөшүүгө багыттоо керек. Бирок БШКнын мүчөлөрү кесиптешин колдогон жок.
Белгилей кетсек, буга чейин бир катар парламенттин депутаттары жана коомдук ишмерлер эпидемиологиялык абалды эске алып, өлкөдө өзгөчө абал киргизүү аркылуу парламенттик шайлоону жылдырууну сунуш кылышкан. Социалдык түйүндөрдөгү талкууларда бул демилгени колдогондор да, «эпидемия учурунда шайлоо өткөрүү элди сыйлабастык болот» дегендер бар.
БШК шайлоону эпидемияга карабастан өз убагында өткөрүү демократиялык өлкө үчүн маанилүү талап экенин билдирип жатат.
Бирок, ошол эле учурда БШКнын сунушу менен Кыргызстанда 12-апрелге белгиленген жергиликтүү кеңештерге шайлоо жылдырылган. Бул шайлоолордун тагдыры учурда белгисиз калууда.