Дин иштери боюнча мамлекеттик комиссиянын мурунку директору Акин Токталиев Ички иштер министрлигинин 10-башкармалыгынын кызматкерлери ажылык сапарга зыяратчылардын акчасынын эcебинен баргандыгын айтты. Бул тууралуу ал журналисттерге билдирди.
Анын айтымында, ал буга чейин тийиштүү арызды Башкы прокуратурага жана УКМКга берген. Ошондой эле, ал президентке жана Жогорку Кеңештин төрагасына кат жөнөткөн. Акин Токталиев Дин иштери боюнча мамлекеттик комиссиянын директору болуп турган кезде ага муфтияттан адамдар келишип, ИИМдин 10-башкармалыгынын кызматкери муфтияттын кызматкерлерине кысым көрсөтүп, Меккеге акысыз барып-келүүнү уюштурууну талап кылганын айтып арызданышканын билдирди.
“Андан тышкары, ал кызматкер досун да аны менен кошо жиберүүнү талап кылган. Бул кызматкер муфтиятка кээде келип, ыйгарым укуктуу адамдарды түшкү тамакка алып барып, моралдык кысым көрсөткөн. Натыйжада, ал ажылык сапарга бара турган адамдардын тизмесине киргизилген. УКМКнын 4-кызматынын кызматкерлери дагы ушундай жол менен ажылыкка барышчу”, – деди ал.
Акин Токталиевдин айтымында, атайын кызматтын кызматкерине зыяратчылардын акчасынын эсебинен чет өлкөгө саякат уюштурулган.
“Дин иштери боюнча мамлекеттик комитеттин башчысы катары мен муфтияттын мүчөлөрүнө мындай тажрыйбаны токтотууга убакыт келди, антпесе алар кызмат ордунан айрылып калышат деп айттым. Анан ушул укук коргоо кызматкерлери мени каралай башташты. Алар менин экстремисттик уюмдар менен мамилем бар деген компромат табышкан. Бул кадыр-баркка шек келтирген маалыматтар Садыр Жапаровго өтүп, ал менин сөзүмдү уккан да жок. Бирок баары бир, мен бул адамдардын чыныгы жүзүн ачам”, – деп билдирди Токталиев.
Сүрөт интернеттен алынды