Асель Кадырбекова, ырчы: “Жазса өзү жазсын, издесе өзү издесин!»

Окуялар тизмеги 19 Авг 2019 14:18
0 ой-пикир

Ырчы жубайлар Нурлан Насип менен Асель Кадырбекованын жашоосу акыркы учурда кызуу талкууланып, “алар эки айрым жолго түшүптүр” деген такталбаган маалымат желдей тарап жаткан кез. Бул сөздөргө жем таштаганына кээ бир маалымат каражаттары “Асель айым кызы Дария менен апасынын үйүндө экен, жолдошу Нурлан Насиптин инстаграм баракчасынан чыгып кетиптир” деген жүйөлөрдү мисал келтирип жазганы бар. Мындай талкуу жараткан жагдайга ырчы жубайлар күйөрмандарынын байма-бай суроолоруна эч кандай жооп бербей келишет… Ал эми Асель Кадырбекова бул талкууларга дагы жем таштап, төмөнкүдөй пост жазды:

  “Бул кыска өмүрдү сый менен өткөрөлү. Бүгүнкү адам эртең топурак. Бир үйдө канча жан болсоң, бири-бириңе коноксуң. Сыйлашсаң тирүүңдө сыйлаш, өлгөндөн кийин ыйлаганда не…? Тирүү адамда мүмкүнчүлүк көп болот. Андыктан жытта, сүй, кучакта, аярла, бооруңа кыс…! Ар мүнөтүңдү жакындарыңа арна. Бул дүйнөдө эч ким түбөлүктүү эмес. Аллах убакыт берди.Таарыныч, иренжүү, наздануу – булар эч убакта бүтпөйт..эгер сен бүтүрбөсөң. Ар жолукканыңда “бир күнү жоготуп алам го” деп кучагыңа кыс. Коштошкондо да “башка көрүшпөй калсамчы” деген ой менен коштош!Сезимиңди- ал сага канчалык кымбат экенин билдир. Убакыттын да,  адамдардын да кадырына жете бил. Жаман көргөн адамыңа өлгөнчө өчөшүп жүргүдөй ал шайтан эмес. Же сен, же ал биринчи кетет. Ошондо өкүнүп калбай тургандай бол. Жакын адамдарыңды баалай бил. Ал бүгүн бар болуусу мумкун, эртен бар болуусу мүмкүн. Кийинки күнү бар болобу жокпу, белгисиз… Кийин ал сенден алыстап кетсе, саныңды чаап калба. Жакындарыңды сагындыңбы, бар дагы кабар ал. Изде, сагынып кеттим деп айт… “Ата, апа…сиздерди жакшы көрөм!” – деп күндө смс жаз. Сезимиңди убагында айтып үйрөн, кийин кеч болуп калбасын үчүн. Акча, атак-данк, мансап,  байлык, сулуулук, машине,  кымбат сотка, кымбат кийим… булар негизгиси эмес. Эң негизгиси – ата-энеге, бир туугандарга, перзенттерге, башка дагы жашоодогу жакын адамдарыңа деген сезим… Сезим – бул жакшы көрүү, сагынуу, издөө, жактырган адамыңа кабатырлануу ж.б. ушинтип кете берет. Сезимсиз өмүр – текке кеткен өмүр. Бул жашоодо акчабыз көп болгондон көрө,  жыгылганда жөлөй турган, ооруганда күйө турган, ыйлаганда соорото турган, кайгырганда жаныңда тура турган, кыйналганда көмөктөшө турган жан-күйөөр жакшыларыбыз көп болсун! Адамдарга эмне берсең, алар сага эки эсе кылып кайтарат. Дилиңдеги өзүмчүлүктү тый! “Жазса өзү жазсын, издесе өзү издесин! Мени эч ким издебейт, мен эмнеге аны издешим керек?!” – дейсин, билем…  Сенин бир ооз жылуу сөзүң анын бүтүндөй жашоосун өзгөртүп жиберүүсү ыктымал. Барды баалай билели, бул өмүр камчынын сабындай кыска. Ушул сөздөрдү окуп жаткан Силерди мен аябай жакшы көрөм!”,– деген ой-толгоосу менен бөлүштү.

Жылдыздуу жубайлар 2018-жылы баш кошуп, 2019-жылдын март айында Дария аттуу тун наристелүү болушкан.

Ой-пикир калтыруу

Ваш e-mail не будет опубликован.

Конул бурунуз: Сиздин пикириниз сайттын администраторунун модерациясынан кийин жайгаштырылат.