Жактоочунун 24.kg агенттигине билдиргенине караганда, Алмазбек Атамбаев жазуу түрүндө көрсөтмө берүүгө даяр. Бирок, буга чейин жарыялангандай ЖМКга эмес, тергөөчүгө гана.

«Мен Алмазбек Атамбаевдин өз көз карашын ИИМ кызматкерлерине билдиргем. Алар ойлонуп мындай формат аларды канааттандырбай турганын айтышты. Алар Алмазбек Атамбаевдин өзүнүн келишин каалашууда. Бирок, Атамбаев мындай талаптар укуктук талаанын чегинен чыгып жаткандыгына байланыштуу, суракка келбей тургандыгын так кесе айткан», -деди Сергей Слесарев.

Экс-президент «Апрель» каналына интервью берип жатып, юристтери мыйзамсыз сурак тууралуу Конституциялык палатага кайрылуу жөнөткөндөрүн айткан.

Ал мунун баарына акыркы чекитти алгач Конституциялык палата коюшу керек деп эсептейт.

Эске салсак, Алмазбек Атамбаевдин иши Кыргызстандын мыйзамдарынын алкагында чечилүүгө тийиш деп президент Сооронбай Жээнбеков Панфилов районунун жашоочулары менен болгон жолугушууда, элдин суроосуна жооп берип жатып билдирген.

«Учурда кыргызстандыктарды мурдагы президент Алмазбек Атамбаевдин тегерегиндеги кырдаалга карата менин көз карашым кызыктыраарын билем. Анын айланасындагы акыркы окуялар, күбө катары суракка чакырылып жатканы — бул мыйзам ченемдүү көрүнүш деп айтат элем. Мыйзамдуу өлкөдө мыйзамдын алкагында гана иш-аракеттерди жүргүзүү керек. Кандай гана адам болбосун — мурдагы президентпи, чиновникпи, аскер кызматкериби, же катардагы кызматкерби — мыйзам баарына бирдей болуп, ар бирибиз ага баш ийишибиз керек. Ошондо гана өлкө өнүгөт. Атамбаевдин иши дагы Кыргызстандын мыйзамдарынын алкагында чечилүүгө тийиш. Менин көз карашым ушундай», — деп баса белгиледи мамлекет башчысы.

Сүрөт интернеттен алынды